જે પુસ્તક ચોરે તેને ચોર ના કહેવાય

 ગૂજરાત વિદ્યાપીઠના વિદ્યાર્થીઓએ સાથે મળીને કંઇક સારું કાર્ય કરવાનું વિચાર્યું અને એ કાર્યના ભાગરૃપે તેમણે ગૂજરાત વિદ્યાપીઠની કેન્ટિનમાં ઓપન લાઇબ્રેરીની શરૃઆત કરવાનું વિચાર્યું. જેથી વિદ્યાર્થીઓ અને અન્ય લોકોને કેન્ટિનમાં જ ચા- કોફીની સાથે સાથે સાહિત્ય પણ મળીરહે. છેલ્લા એક મહિનાથી ગૂજરાત વિદ્યાપીઠની કેન્ટિનમાં ઓપન લાઇબ્રેરી કોન્સેપ્ટ કાર્યરત છે. આ લાઇબ્રેરીમાં ગાંધીજીની આત્મકથા, ગ્રામસ્વરાજ, ગાંધીવાણી જેવા ગાંધી વિચારના પુસ્તકો મૂકવામાં આવ્યા છે.

 ગૂજરાત વિદ્યાપીઠના વિદ્યાર્થીઓએ ચા- કોફી, નાસ્તા સાથે ગાંધીવિચાર સાહિત્ય વાંચી શકાય એ માટે કેન્ટિનમાં ઓપન લાઇબ્રેરી શરૃ કરી. એક જ મહિનામાં આ ઓપન લાઇબ્રેરીમાંથી ગાંધીજીની આત્મકથા સહિત મોટા ભાગના પુસ્તકો વિદ્યાર્થીઓ લઇ ગયા જે આ કોન્સેપ્ટને મળેલી સફળતા દર્શાવે છે

કેન્ટિનમાં ૧૭ જેટલા ટેબલ પર પુસ્તકો રાખવા માટે સ્પેશિયલ બોક્સ બનાવી ૬૦થી વધારે પુસ્તકો અને ૬૦થી વધારે ગાંધીજીના ફોટા સાથેના સ્લોગનો લેમિનેટ કરીને રાખાવમાં આવ્યા હતા, પરંતુ અત્યારે આ ઓપન લાઇબ્રેરીમાં માંડ ૨૦થી ૨૫ પુસ્તકો અને ૨૦-૨૫ સ્લોગનો જોવા મળે છે. મોટા ભાગના પુસ્તકો અને સ્લોગનો વિદ્યાર્થીઓ અને બહારના લોકો પોતાની સાથે લઇ ગયા છે. આ અંગે વિદ્યાર્થી કિરીટ ચોધરી કહે છે કે, વિદ્યાર્થીઓ લાઇબ્રેરીમાં જવાને બદલે કેન્ટિનમાં બેસીને ગાંધી સાહિત્ય વધારે વાંચે છે. વિદ્યાર્થીઓ હકીકતમાં આ ઓપન લાઇબ્રેરીમાંથી પોતાને ગમતું પુસ્તક વાંચવા માટે લઇ જાય છે. જે એક સારી વાત કહેવાય. આ ઓપન લાઇબ્રેરીમાં દર મહિને પુસ્તકો અને સ્લોગનો બદલવામાં આવે છે, કારણ કે એકના એક જ પુસ્તકો અને સ્લોગનો રાખવામાં આવે તો મોનોટોનસ થઇ જાય છે. આ કોન્સેપ્ટને સારો પ્રતિસાદ મળ્યો હોવાથી હજી વધારે પુસ્તકો અને ૧૫૦ જેટલા નવા સ્લોગનો મૂકવામાં આવશે. આ લાઇબ્રેરી બનાવવાનો ખર્ચ ૫,૦૦૦ રૃપિયા જેટલો થયો છે અને પુસ્તકો ગૂજરાત વિદ્યાપીઠ તરફથી પ્રોવાઇડ કરવામાં આવે છે.
 આ અંગે સ્ટુડન્ટ ભરત ગાંગાણી કહે છે કે, હકીકતમાં વિદ્યાર્થીઓ પુસ્તકો વાંચવા માટે ચોરે છે. એટલે પુસ્તક ચોરે તેને ચોર ના કહેવાય, અને આ ઓપન લાઇબ્રેરીમાંથી મોટા ભાગના પુસ્તકો ચોરાઇ ગયા તે આ કોન્સેપ્ટને મળેલી સફળતા દર્શાવે છે.
તસ્વીર- સુરેશ મિસ્ત્રી