નેશનલ સાયન્સ ઓલિમ્પિયાડમાં ગુજરાત પ્રથમ

 અમદાવાદની શેઠ સી.એન વિદ્યાલયમાં ગુજરાતી માધ્યમમાં અગિયાર સાયન્સમાં અભ્યાસ કરતો જ્યોત અંતાણીએ હમણાં જ યોજાયેલ નેશનલ સાયન્સ ઓલિમ્પિયાડમાં ૯૯. ૭૪ ટકા સાથે સમગ્ર ગુજરાતમાં પ્રથમ સ્થાન અને સમગ્ર ભારતમાં એકાવનમો રેન્ક મેળવ્યો છે. સમગ્ર ભારતમાંથી લાખ્ખો વિદ્યાર્થીઓ નેશનલ સાયન્સ ઓલિમ્પિયાડમાં ભાગ લે છે. જેમાં જ્યોત અંતાણીએ ગુજરાતમાં પ્રથમ નંબર મેળવીને ગુજરાતના ગૌરવમાં વધારો કર્યો છે.
ધોરણ દસ સુધી ગુજરાતી માધ્યમમાં જ અભ્યાસ કર્યો હોવા છતાં રાષ્ટ્રીય કક્ષાના સાયન્સ ઓલિમ્પિયાડમાં રેન્ક મેળવવો ખૂબ મુશ્કેલ છે. જ્યોતે ગયા વર્ષે દસમાં ધોરણમાં ગુજરાતમાં નવમો અને અમદાવાદમાં ત્રીજો નંબર પ્રાપ્ત કર્યો હતો. આ અંગે જ્યોત કહે છે કે, હું પહેલેથી જ ટયૂશન વગર અભ્યાસ કરું છું. અને ગણિત મારો પ્રિય વિષય છે. અને આઇ.આઇ. ટીમાં પ્રવેશ મેળવવા માટે મેં અત્યારથી જ મહેનત કરવાની શરૃઆત કરી દીધી છે.

અમદાવાદની સી.એન. વિદ્યાલયમાં ધો. ૧૧ સાયન્સ ગુજરાતી માધ્યમમાં અભ્યાસ કરતા જ્યોત અંતાણીએ નેશનલ સાયન્સ ઓલિમ્પિયાડમાં ગુજરાતમાં પ્રથમ નંબર અને સમગ્ર ભારતમાં એકાવનમું સ્થાન મેળવ્યું છે

માત્ર ભણવામાં જ નહીં ભણવાની સાથે સાથે સાહિત્ય સંગીતમાં પણ જ્યોત માહેર છે. અમદાવાદના જાણીતા સંગીતજ્ઞા ડો. મોનિકા શાહના માર્ગદર્શન હેઠળ જ્યોતે હમણાં જ શાસ્ત્રીય સંગીત ગાયનમાં વિશારદની ડિગ્રી મેળવી છે. અને તેમને હાર્મોનિયમ તથા તબલા વગાડવાનો પણ અદ્ભૂત શોખ છે. સાથે સાથે તેને ગુજરાત સુગમ સંગીતનો પણ અનહદ શોખ છે. જ્યોત ગુજરાતી સાહિત્ય વાંચવાનો પણ ખૂબ શોખીન છે. તેમણે ગુજરાતી સાહિત્યની મોટા ભાગની નવલકથાઓ વાંચી છે. જ્યોત માત્ર ભણવામાં જ નહીં પરંતુ સંગીત, શિક્ષણ અને સાહિત્યને લગતી બહુમુખી પ્રતિભા ધરાવે છે.