માલિકો બદલાઈ ગયા પણ ભાડૂઆત તો એના એ જ

મેગા સિટી અમદાવાદમાં છેલ્લા બે વર્ષમાં રિયલ એસ્ટેટ ક્ષેત્રે ખૂબ જ ભાવ વધારો થયો છે. સામાન્ય રીતે એક બેડરૂમ,હોલ, કિચન ફ્લેટનું ભાડૂ ઓછામાં ઓછું ૫૦૦૦થી ચાલુ થાય છે. ત્યારે આશ્ચર્યની વાત એ છે કે શહેરના જૂના ભાડૂઆતો આજે પણ રૂ.૫ થી લઇને ૭૦-૮૦ રૂપિયા જ માસિક ભાડૂ ચૂકવીને રહે છે.
હાલની નવી પેઢીમાં લોકો આ વાતને માનવા તૈયાર નથી.


શહેરમાં આશરે એક લાખ જેટલા મકાનો એવા છેે જેનું ભાડૂ રૂ.૫,રૂ.૧૦ કે વઘુમાં વઘુ રૂ.૫૦ છે.ઘણાં મકાનોના તો માલિકો બદલાઇ ગયા છે પણ ભાડૂઆતો હજી જૂના જ છે.ચાળીસ વર્ષ પહેલાના અમદાવાદમાં માલિકો સામે ચાલીને ભાડૂઆતને બોલાવવા જતા હતા. આજે ૫૦,૦૦૦ ભાડૂ ચૂકવનારે પણ અનેક કરારો કરવા પડે છે

અમદાવાદના કોટ વિસ્તારમાં છેલ્લા ૭૫ વર્ષથી લુણસાવાડ,ઘી કાંટામાં આવેલા કે.કે. શાહના ડેલામાં રહેતા જશુભાઇ પંચાલ કહે છે કે અમારી બે પેઢી આ જૂના મકાનમાં જ વીતી ગઈ. વર્ષો પહેલા રૂ.૫ ભાડૂ હતું અને જે આજે વધીને ૧૨ રૂપિયા થયું છે. જશુભાઇ કહે છે કે, અમે ૭૫ વર્ષથી ભાડે રહીએ છે. મકાનના ત્રણ માલિકો બદલાઇ ગયા છે પણ ભાડૂઆતો હજી જૂના જ છે. અને જૂના ભાડા ચૂકવીને જ રહે છે. પહેલાના સમયમાં માલિકો ભાડૂઆતોને સામેથી રહેવા માટે બોલાવતા હતા. ૯૮ વર્ષના શાંતાબાએ પાંચ રૂપિયાના ભાડૂ ચૂકવીને આખી જિંદગી પસાર કરી છે. નિયમ પ્રમાણે તો હવે અમે જ માલિક જેવા બની ગયા છીએ.
મહાદેવવાળો વંડામાં રહેતા ૬૦ વર્ષિય કાનજી મેવાજી ૧૦ રૂપિયા ભાડૂ ભરે છે. કાનજીભાઇ કહે છે કે, મારો જનમ જ આ ભાડાના મકાનમાં થયો હતો. ઓછું ભાડૂ હોવાનું કારણ એ છે કે પહેલા ભાડૂ કમાવાનું સાધન નહોતું. જ્યારે આજે કમાવાનું સાધન બની ગયું છે.લાઈટબીલ અને મ્યુનિસિપલ ટેક્સ કરતા પણ અમારૂં ભાડૂ અનેક ગણું ઓછું છે.હું મારા જૂના મકાન માલિકનો આભારી છેું કે જેમણે મને આટલા ઓછા ભાડામાં રહેવા દીઘો.
અમદાવાદમાં મીલોના વિકાસ સાથે ચાલીઓનો પણ વિકાસ થયો હતો. ચાલીઓના વિકાસ સાથે ગામડાઓમાંથઈ આવનારા અનેક મીલમજૂરો ઓછા ભાડામાં અમદાવાદના રખિયાલ,સરસપુર,ગોમતીપુર,કાલુપુર જેવા વિસ્તારોમાં ઓછા ભાડે રહેતા. મકાન માલિકોની અનેક પેઢીઓ જતી રહી પણ ભાડૂ તો આજે પણ એટલું જ છે.
શહેરમાં ઘનવાન ભાડૂઆતો આવે તો માલિકો થોડું ભાડૂ વધારી દે છે. ૫૦ વર્ષના પહેલાના ભાડૂઆતો છે તેમનું ભાડૂ ૩૦ રૂપિયાછે. જ્યારે ૨૦-૨૫ વર્ષ જૂના છે તેમનું ભાડૂ ૧૨૫ રૂપિયા છે. માત્ર ૭૫ રૂપિયા ભાડું મૂકવતા અમે ૩૫ વર્ષથી ભાડે રહેતા વિનોદચંદ્ર સુથાર કહે ચે કે, પહેલા પૈસાનું મહત્ત્વ નહોતું પણ માણસનું મહત્ત્વ હતું.
માલિક સારા માણસો આવીને શહેરમાં વસે એ માટે ડેલાઓ અને ચાલીઓ બાંધતા. અને એક- બે રૂપિયામાં ભાડે આપતાં? આજના સમયમાં ૧૨,૦૦૦ રૂપિયા ભાડૂ ચૂકવતા પણ માલિકનો કકળાટ સાંભળવો પડે છે ત્યારે જૂના શહેરમાં લોકો ૧૦-૧૫ રૂપિયા ભાડૂ ચૂકવીને શાંતિથી રહે છે. સાથે પ્રાથમિક સુવિધાઓ પણ ભોગવે છે.
તસ્વીર : સુરેશ મિસ્ત્રી